Markmið BPW
Konur um allan heim sameinast í að vinna að eftirtöldum markmiðum BPW
- Að hvetja konur til ábyrgðar og aukinnar samfélagsþátttöku bæði heima fyrir og á alþjóðlegum vettvangi.
- Að hvetja konur á öllum aldri til að afla sér menntunar og starfsþjálfunar.
- Að vinna að efnahags– og félagslegu jafnrétti kvenna í öllum löndum heims.
- Að vinna að vináttutengslum og gagnkvæmum skilningi kvenna á alþjóðlegum vettvangi.
- Að jafna launamun kynjanna.
Jafnrétti verður hvorki varanlegt né áhrifaríkt nema að undirstaða þess sé traustur og góður efnahagur”
Upphaf Kvennasamtakanna BPW og IFBPW
Kvennasamtökin Business and Professional Women eða BPW voru stofnuð í Bandaríkjunum árið 1919. Stofnandinn var dr. Lena Madesin Pillips. Dr. Pillips var lögfræðingur sem hóf starfsferil sinn árið 1917. Þegar hún var komin út á vinnumarkaðinn fann hún áþreifanlega fyrir því að konur voru þar bæði fáar og einangraðar. Hún ákvað því að koma á tengslaneti fyrir konur á vinnumarkaði sem væri m.a. vettvangur kvenna til að skapa samstöðu sín í milli. Konurnar tóku þessari hugmynd fagnandi og fljótlega voru komnir BPW félög í öll fylki Bandaríkjanna. Árið 1930 voru alþjóðasamtök BPW stofnuð. Alþjóðasamtökin nefnast International Federation of Business and Professional Women – IFBPW. Eftir stofnun þeirra hafa starfsemi og lög allra BPW-félaga í heiminum byggt á lögum alþjóðasamtakanna. Á þriggja ára fresti eru haldnar alþjóðlegar ráðstefnur BPW og er þátttaka í þeim opin öllum BPW félagskonum. Á þessum ráðstefnum er kosið í stjórnir og nefndir IFBPW. Innan IFBPW er aðildarlöndum skipt upp í fimm svæði sem eru: Afríka, Asía ásamt Kyrrahafssvæðinu, Evrópa, Suður-Ameríka og spænskumælandi lönd Karíbahafsins, og Norður–Ameríka.
Alþjóðasamtök BPW
Alþjóðasamtök BPW eru virk og kraftmikil kvennasamtök víðs vegar um heiminn. Samtökin hafa frá stofnun haft áhrif á almenningsálit og löggjöf í mörgum löndum og þannig hvatt til aukinna réttinda og tækifæra félagskvenna. Samtökin njóta trausts og starfa náið með ýmsum stofnunum Sameinuðu þjóðanna s.s. UN WOMEN, UNESCO, UNICEF, WHO og FAO auk þess sem þau starfa einnig með Evrópuráðinu og fleiri nefndum og stofnunum.
Tilgangur
Megin tilgangur alþjóðasamtaka BPW er að efla og styrkja konur innbyrðis og að stuðla að samstöðu, tengslum og samvinnu kvenna í hverju landi fyrir sig og um allan heim.
Evrópusamtök BPW
Evrópusamtökin eru í nánu samstarfi við mörg alþjóðleg kvennasamtök.
- Evrópusamtökin voru stofnuð 1930 og eru innan alþjóðasamtakanna og hafa mikil áhrif á alþjóðastarfið.
- Í gegnum Evrópusamtökin er BPW Reykjavík aðili að European Women's Lobby sem eru regnhlífasamtök yfir 2700 ópólitísk kvennasamtök í Evrópu. Þar eiga Evrópusamtökin einn fulltrúa í stjórn og einn áheyrnarfulltrúa. Ísland tilheyrir Evrópusamtökunum.
- Evrópusamtök BPW halda ráðstefnu á þriggja ára fresti auk þess sem forsetafundir eru haldnir í raunheimum árlega og enn oftar í netheimum.
